Me karrierën si futbollist pas vetes, Taulant Xhaka nuk është larguar nga fusha – përkundrazi, ai po shkruan një kapitull të ri si trajner i FC Dardania, dhe deri tani gjithçka po shkon për mrekulli, nis reportazhin gazeta e njohur zvicerane 20 minuten.

Ish-mesfushori i Kombëtares shqiptare dhe legjenda e Baselit, Taulant Xhaka, vendosi të mos qëndrojë larg futbollit pas tërheqjes nga karriera aktive këtë verë. 34-vjeçari mori drejtimin e klubit FC Dardania, një skuadër nga liga e katërt zvicerane, dhe menjëherë ka lënë gjurmë: 8 fitore në 8 ndeshje, me një goldallim të frikshëm, prej 42:8.

Si lindi bashkëpunimi me Dardaninë?

Presidenti i klubit, Tahir Çitaku, pas një sezoni të dështuar ku FC Dardania nuk arriti ngjitjen në ligë më të lartë, në kërkim të një trajneri të ri, e kontaktoi Ragip Xhakën – babain e Taulantit dhe Granitit – i cili ndodhej në Kosovë, por u kthye menjëherë në Zvicër për të vizituar klubin, bashkë me djalin dhe familjen e tij.

Pas një bisede pesëminutëshe, Taulanti dha fjalën e tij me një premtim të thjeshtë, por domethënës: “Besa”. Një fjalë që mban peshë të madhe në kulturën shqiptare. Disa javë më pas, ai e konfirmoi vendimin: do të bëhej trajneri i ri i FC Dardania.

Trajner i qetë, por me ide të qarta

Pavarësisht reputacionit që kishte si lojtar impulsiv në fushë, Xhaka si trajner ka një qasje më të qetë: “Jam i qetë. Në dhomat e zhveshjes mund të ngre zërin ndonjëherë, por nuk mendoj që një trajner duhet të bërtasë gjithmonë. Duhet të dish si t’i qasesh lojtarëve, sidomos kur janë amatorë.”

Në bankën e Dardanisë, ai duket i lumtur. Komunikon me stafin e vogël që ka në dispozicion, flet me buzëqeshje dhe shijon çdo moment. “Jam shumë i kënaqur me atë që kemi arritur. Ekipi ka përparuar dukshëm që kur e mora drejtimin. Jam i lumtur,” – deklaron ai.

Objektivat: Një ligë më lart – pse jo edhe më shumë?

Në ambientet e klubit është krijuar një atmosferë pozitive. Objektivi i radhës është ngjitja në “2. Liga Interregional”, por brenda klubit fillon të përmendet edhe ëndrra për të arritur një ditë deri në ligën e parë. Me një trajner të përkushtuar si Xhaka dhe një ekip që fiton çdo ndeshje, entuziazmi është i kuptueshëm.

Një jetë e re pas futbollit profesionist

Jeta pas karrierës profesioniste duket se i përshtatet shumë mirë Taulant Xhakës. “Po e shijoj shumë kohën me familjen dhe miqtë. Pas ndeshjeve ndonjë birrë, ndonjë darkë e qetë – gjëra që si profesionist nuk mund t’i bëja lirisht. Tani është ndryshe, është bukur.”

Sa për vizitën te vëllai i tij Graniti, i cili luan për Sunderlandin në Angli, Taulanti thotë se nuk ka qenë ende, por “shumë shpejt” do ta vizitojë. Për momentin, ai duket plotësisht i përqendruar te FC Dardania dhe te misioni i tij i ri – të ndërtojë një skuadër fituese dhe të formojë lojtarë të rinj, me pasion dhe përkushtim.